Eph 2 | MED | STEP | Unt ui mbila, enim ik pili napilik, wote uⱡ kit mbᵾ, etᵾng ni kᵾn, enim nga min orunga, koⱡpa pora ndurum.

Ephesians 2

Got Ndi, Tᵾn Kraist Kᵾn Etpa Peng Kont Titim

1 Unt ui mbila, enim ik pili napilik, wote uⱡ kit mbᵾ, etᵾng ni kᵾn, enim nga min orunga, koⱡpa pora ndurum. 2 Ei kᵾn, enim mᵾi kona uⱡ kit mbᵾ pep rorung. Wote, enim ya mᵾi kona kur kit mbᵾ nga wu peng mumuk ei nga, ik teng ndurᵾng. Kur kit ei, Got nga ik tᵾk roi ndurmᵾn wamp mbᵾ kᵾn, moⱡpa kongun etᵾm. 3 Tᵾn unt wamp rᵾⱡaip kᵾⱡ kᵾn, i ku etᵾp murmᵾn. Ei kᵾn, tᵾn nga kᵾng orunga paka ruimin, numan ou ndupa pilpᵾn ᵾndᵾrmᵾn. Wamp wei mbᵾ mel, tᵾn unt metᵾng ei kᵾn, tᵾn numan kit mbᵾ, pendᵾp mep urmᵾn. Ei kᵾn, wamp wei mbᵾ mel, tᵾn i ku etpᵾn, Got nga popᵾⱡ ila mindil noⱡmina. 4 Ni kᵾn wote, Got wamp numan minal ngumba. Wote, wamp kont kul uⱡ ei, ama mandpa tetᵾm ei ndi, tᵾn uⱡ kit minal itmᵾn mbᵾ ndi, ropa kundrum ila kandpa, tᵾn Kraist kᵾn etpa peng kont titim. Got nga wamp poⱡ tᵾtᵾm uⱡ ila, enim etpa titim. 6 Tᵾn Kraist Jisas kᵾn ⱡoporpa tᵾpa, wi muⱡ kona tetᵾm mel mbᵾ, elim kᵾn kunda rᵾp itᵾmin nimba itim. 7 I itim uⱡ ei, wamp rᵾⱡaip akil tek oⱡa uing mbᵾ, ora ndupa, elim nga wamp poⱡ tᵾpa, numan ngorum uⱡ ei, oⱡa orunga tetᵾm. Ei kᵾn, Kraist Jisas kᵾn tᵾpa mot ndurum. 8 Got nga wamp poⱡ ti uⱡ ila, enim mondᵾk pᵾⱡᵾngina, enim etpa peng kont titim. Ei nga, enim nga uⱡ ti iti natᵾtᵾng. Wote, Got elim nga gem ngui uⱡ ei ngurum. 9 Uⱡ ei, wamp ti ndi, elim nga ronduⱡ ila kongun etᵾp tint nimba, elim nga mbi oⱡa tᵾmba, mel kapⱡa mon. 10 Got ndi, tᵾn mim itim. Wote, Kraist Jisas kᵾn tᵾp tenda etmin uⱡ ila, kongun kai mbᵾ itᵾmin nimba, tᵾn mim itim. Ei nga, Got ndi, tᵾn itᵾmin nimba, unt kor nga tᵾpa kun etpa tinditim.

Wamp Rᵾⱡaip Raⱡ Kraist Ndi, Tᵾpa Tenda Endᵾtᵾm

11 Jura wamp mbᵾ, kᵾng kupti uⱡ etmin ei, enim pᵾtmin ni, wote enim wamp rᵾⱡaip elpa kᵾⱡ kundᵾk, ‘kᵾng kupti nᵾpti wamp,’ nᵾtmin. Ik ei, enim pilik kai itᵾi! Unt ni, (wamp kᵾng ila etmin uⱡ ila mendpᵾⱡ), enim kundᵾk wamp rᵾⱡaip elpa nᵾtᵾng. 12 Ui ni kᵾn, enim Kraist kᵾn nondpa, muⱡi nambᵾrᵾng. Enim mbo wamp mel morung. Got nga mbi ropa titim wamp kᵾⱡ kᵾn kep, muⱡi nambrᵾng ku. Wote, Got elim nga wamp kᵾⱡ kᵾn, ik mi tepa, wote nimba mᵾi ropa itim uⱡ ila kep, enim muⱡi nambᵾrᵾng mon ku. Mᵾi kona uⱡ mbᵾ ndi, enim ropa wᵾlᵾ mundrum. Mel ti wote, ui mbila, timin nᵾk pili napᵾtᵾng. Wote Got kep, pili napᵾtᵾng ku. 13 Wote, akup enim Kraist Jisas nga wamp kᵾⱡ mormin. Unt enim Got kᵾn roⱡ etᵾk morung. Ni wote, akup Kraist nga mema oi nitim uⱡ ila, enim Got kᵾn nondpa puk mormin.

14 Kraist elim ndi, moⱡpa kundi uⱡ ei ngorum. Uⱡ ei ndi, tᵾn Jura wamp mbᵾ kᵾn, wamp rᵾⱡaip elpa nᵾnmᵾn mbᵾ, tᵾpa tenda etᵾm. Wamp rᵾⱡaip raⱡ, unt oi kan pendᵾk, el puⱡa wamp morung. Ni kᵾn, Kraist ndi, elim nga kᵾng ei, wak ropa, el puⱡa pitim oi kan ei, ropa puⱡa rurum. 15 Jura wamp mbᵾ nga mi ik ei, Kraist elim ndi, ropa wei ai inditim. Wote rᵾⱡaip raⱡ, elim kᵾn tᵾpa tenda etpa, wamp rᵾⱡaip kont kᵾⱡ muⱡeing nimba itim. I etpa kᵾn, wamp rᵾⱡaip raⱡ, moⱡpa kundi uⱡ ila, tᵾpa ruk ndurum. 16 Kraist nde peta ila kurum uⱡ ei ndi, rᵾⱡaip raⱡ tᵾpa tenda itim. Ei kᵾn, nde peta ila, rᵾⱡaip raⱡ, tᵾpa kᵾng tenda etpa mepa, Got kᵾn nondpa purum. 17 Wote, Kraist urum ei ndi, moⱡpa kundi Rᵾnang Ik Kai mbᵾ nimba, enim wamp rᵾⱡaip elpa, Got kᵾn ruⱡ etᵾk morung mbᵾ kep, Jura wamp en enim Got kᵾn nondpa morung mbᵾ kep, pora nimba ngurum. 18 Tᵾn wamp rᵾⱡaip raⱡ, Kraist kᵾn Muⱡnga tenda ila moⱡpᵾn, Wuta Got kᵾn kapⱡa mbin.

19 Ei nga, enim mbo wamp rᵾⱡaip kᵾⱡ, akup wamp tᵾma muna, nomba ᵾndi wamp kat mon. Wote, akup enim Got nga wamp mbᵾ kᵾn, rᵾⱡaip tenda mormin. Got kᵾn manga rapa tenda wamp kᵾⱡ mormᵾn. 20 Got nga manga mendpᵾⱡ ei, enim wamp kᵾⱡ mormin. Tᵾn nombuⱡa rung wu, ik painui wu na mbᵾ, manga mbo nga mel moⱡmina, wote Kraist Jisas elim ei, manga paka rumᵾnt mel morum. 21 Kraist elim ndi, manga ei nga melamp rukᵾr orunga petᵾm mbᵾ, tᵾpa rak ndupa ambuⱡpa, Nuim ei nga manga wingti ti muⱡangga nimba, etpa oⱡa tᵾtᵾm. 22 Enim manga pel ndaⱡ na ni mel, Kraist kᵾn rok kundᵾk moⱡᵾngina, Got ndi, enim mondpa pili wamp rᵾⱡaip mat kᵾn, tᵾpa rak nduⱡnga, enim Got nga manga mendpᵾⱡ ei mormin. Manga ila, Got elim nga Muⱡnga ei, pepa morum.